三歲定八十，好多名人細個果陣已經嶄露頭角，就好似詩人郭沫若咁，年紀細細就識對對聯、作對聯，難怪大個之後咁叻寫詩喇。郭沫若4歲半就返私塾，有一年私塾周圍嘅桃熟咗，唔少學生為食，走去偷桃。先生發現之後好嬲，上堂果陣就出上聯挖苦班學生：「昨日偷桃鑽狗洞，不知是誰？」仲同學生講明，邊個對得好，就可以唔駛受罰、捱打，郭沫若諗咗一陣，就對：「他年折桂步蟾宮，必定有我。」對得咁工整，又有大志，先生當堂拍爛手掌，仲免咗對所有學生嘅懲罰添。

到咗郭沫若14歲果年，佢去樂山城讀書。有一次佢經過城門，見到有農民擔住啲便便出城，守城門嘅役吏就以維護衛生之名，硬要農民每人交2蚊「衛生稅」。郭沫若睇唔過眼，即場寫咗一聯：「自古未聞糞有稅，而今只剩屁無捐。」圍觀嘅路人無不拍手叫好，啲役吏睇完亦自知理虧，靜靜雞走佬。

原圖嚟自網絡。